ఓటిటి మూవీ రివ్యూ: మిడిల్ క్లాస్ మెలొడీస్ – ఎమోషన్ ఓకే, మెలోడీనే మిస్ అయ్యింది.!

రౌడీ బాయ్ విజయ్ దేవరకొండ బ్రదర్ గా, ‘దొరసాని’ సినిమాతో తెలుగు ప్రేక్షకులకు పరిచయమైన ఆనంద్ దేవరకొండ హీరోగా చేసిన రెండవ సినిమా ‘మిడిల్ క్లాస్ మెలొడీస్’. వర్ష బొల్లమ్మ హీరోయిన్ గా నటించిన ఈ సినిమా థియేటర్స్ ని స్కిప్ చేసి నేడు డైరెక్ట్ గా ఓటిటి ప్లాట్ ఫామ్ అమెజాన్ ప్రైమ్ లో రిలీజయ్యింది. మరి రెండవ సినిమాతో అయినా ఆనంద్ దేవరకొండ హిట్ కొట్టాడో లేదో చూద్దాం.?

కథ:

గుంటూరుకి 17కిమీ దూరంలో కొలకలూరు అనే ఒక పల్లెటూరిలో ఉండే రాఘవ(ఆనంద్ దేవరకొండ) నాన్న చాలా చిన్న హోటల్ రన్ చేస్తుంటారు. ఆ ఊర్లో బొంబాయి చెట్నీ చేయడంలో రాఘవ చాలా ఫేమస్. ఎప్పటికైనా వాళ్ళ నాన్నలా ఆ ఊర్లోనే ఉండిపోకూడదని, గుంటూరు వెళ్లి హోటల్ పెట్టాలనే కోరికతో ఉంటాడు. పలు సమస్యలను అధిగమించి ఫైనల్ గా గుంటూరులో హోటల్ పెడతాడు. అదే సమయంలో ఎప్పుడో కాలేజ్ డేస్ లో బ్రేక్ అయిపోయిన మరదలు సంధ్య (వర్ష బొల్లమ్మ) ప్రేమ కూడా మళ్ళీ ట్రాక్ లో పడుతుంది. కానీ హోటల్ సక్సెస్ అవ్వకపోవడం వలన అడుగడుగునా రాఘవకి సమస్యలు వస్తూనే ఉంటాయి. ఆ సమస్యలు ఎలాంటివి? ఎలా అధిగమించాడు? చివరికి తన హోటల్ సక్సెస్ అయ్యిందా లేదా? అలాగే తన మరదలు సంధ్యని పెళ్లి చేసుకున్నాడా? లేదా? అన్నదే కథ.

తెర మీద స్టార్స్..

తెరపై ఆనంద్ దేవరకొండ, వర్ష బొల్లమ్మ, దివ్య మరియు అతిధి పాత్రలో కనిపించిన తరుణ్ భాస్కర్ లాంటి వారు తప్ప మిగతా నటీనటులు అందరూ చాలా రోజుల తర్వాత తెరపై కనిపించారు, అలాగే చాలా వరకూ కొత్త వాళ్ళు కూడా ఉన్నారు. ఒక్క హీరోని మినహాయిస్తే అందరూ చాలా బాగా చేశారు. హీరో ఫాదర్ గా చేసిన గోపరాజు రమణ తన నటనతో అందరికన్నా ఎక్కువ మార్కులు కొట్టేశారు. సినిమా గుర్తున్న లేకపోయినా ఈ పాత్ర గుర్తుండిపోద్ది, అలాగే చాలా బాగా కనెక్ట్ అవుతారు కూడాను. హీరోయిన్ వర్ష బొల్లమ్మ, దివ్యలతో పాటు హీరో ఫ్రెండ్ పాత్రలో చేసిన చైతన్య గరికపాటి కూడా అటు ఫన్ తో పాటు, ఎమోషన్ ని కూడా బాగా పలికించాడు. మిగిలిన చిన్న చిన్న పాత్రలు చేసిన నటీనటులు అంతా మెప్పించారు. ఫైనల్ గా హీరో ఆనంద్ దేవరకొండ మాత్రం నటనలో తనదైన ముద్ర వేసుకోవడంతో వెనకబడిపోయాడని చెప్పాలి. ముఖ్యంగా కొన్ని ఎమోషనల్ సీన్స్ లో డైలాగ్ డెలివరీ బాలేదు. సినిమాలో అబ్బా భలే చేసాడు అనే సీన్ ఒక్కటీ లేదనే చెప్పాలి.

తెర వెనుక టాలెంట్..

తెరపైన క్రెడిట్ అంతా గోపరాజు రమణ కొట్టేస్తే తెరవెనుక క్రెడిట్ 50% రైటర్ జనార్దన్ పసుమర్తి మరియు డైరెక్టర్ వినోద్ అనంతోజు కొట్టేశారు. మనలో ఆశకి – అవకాశానికి మధ్య కొట్టుమిట్టాడే మిడిల్ క్లాస్ ప్రజలే ఎక్కువ ఉంటారు. వారందరినీ టచ్ చేసేలా కథని, కథలోని అంశాలను, భావోద్వేగాలను రాసుకున్న విధానం చాలా బాగుంది. రాసుకున్న ప్రతి పాత్రని అవసరానికి వాడుకొని వదిలేయకుండా, ప్రతి పాత్రతో, ప్రతి ప్రాపర్టీతో(మామిడి చెట్టు, దేవుడి బొమ్మ) చుట్టూ వేసుకున్న ఎమోషనల్ కనెక్షన్ ఈ సినిమాకి ప్రధాన హైలైట్. అలాగే జాతకాలు, రాహు కాలాలు లాంటి వాటిని నమ్మాలా? వద్దా? అనే పాయింట్ ని కర్రా విరక్కూడదు పాము చావకూడదు అనే స్టైల్ లో చెప్పిన విధానం బాగుంది. ఇలాంటి వాటి వలనే సినిమా అక్కడక్కడా బోర్ కొట్టేస్తున్న, హీరో మెప్పించకపోయినా సినిమా చూడగలము. కానీ హీరో బొంబాయి చట్నీ అనే మెయిన్ పాయింట్ ని మాత్రం అంత సంతృప్తికరంగా చెప్పలేదు. ఓవరాల్ గా రైటింగ్ అండ్ అనుకున్న ఎమోషన్స్ ని రీచ్ చేయడంలో జనార్దన్ – వినోద్ లు సక్సెస్ అయ్యారు. కానీ కథనం పరంగా చాలా చోట్ల రిపీటెడ్ సీన్స్ అనిపించడం కారణంగా, సినిమాలో ఎక్కడా హై అండ్ లో మోమెంట్స్ లేకుండా ఊహించినట్టుగానే అలా ఫ్లాట్ గా వెళ్లిపోవడం మైనస్. ఇక డైరెక్టర్ గా ఎమోషన్స్ ని రీచ్ చేసినా పూర్తి సినిమాగా 2 గంటల 15 నిమిషాలు ఆసక్తికరంగా నడిపించలేకపోయాడు. పైన చెప్పినట్టు హీరో వీక్ అని ముందే తెలుసుకున్నారో ఏమోగానీ తెలివిగా కథ మొత్తం హీరో ఉన్నా చుట్టూ ఉన్న పాత్రలమీదే కథ నడిపించారు. చివరిగా గుంటూరు మాండలికంలో రాసిన డైలాగ్స్ కూడా చాలా బాగున్నాయి.

ఇక స్వీకర్ అగస్తి – ఆర్.హెచ్ విక్రమ్ లు అందించిన పాటలన్నీ సందర్భానుసారంగా బాగా కుదిరాయి, అలాగే నేపధ్య సంగీతం కూడా సినిమాకి చాలా ప్లస్ అయ్యింది. సన్నీ విజువల్స్ కూడా కథకి తగ్గట్టు చాలా నాచురల్ గా ఉన్నాయి. భవ్య క్రియేషన్స్ నిర్మాణ విలువలు బాగున్నాయి.

విజిల్ మోమెంట్స్:

– గోపరాజు రమణ చేసిన తండ్రి పాత్ర
– హీరో – ఫాదర్ మధ్య వచ్చే సన్నివేశాలు
– ప్రతి పాత్రని కెనెక్ట్ చేసిన ఎమోషన్స్
– రైటింగ్ అండ్ మ్యూజిక్

బోరింగ్ మోమెంట్స్:

– హీరో పాత్రకి కనెక్ట్ కాకపోవడం
– ఆసక్తికరంగా లేని కథనం
– రిపీటెడ్ గా అనిపించే సన్నివేశాలు
– రన్ టైం

విశ్లేషణ:

ఎంత మంచి చెఫ్ అయినా, రోజూ చేసేలా వంట చేసినా కొన్నిసార్లు రుచి సరిగా ఉండదు. అదే ఈ సినిమాలో జరిగింది. చాలా మందికి కనెక్ట్ అయ్యే పాయింట్ తో ‘మిడిల్ క్లాస్ మెలోడీస్’ ని రూపొందించినప్పటికీ హీరో ఆనంద్ దేవరకొండ పాత్ర, పెర్ఫార్మన్స్ లో జరిగిన లోపల వల్ల అనుకున్న స్థాయిలో సినిమా రీచ్ కాలేదు. కానీ రైటర్ జనార్దన్ – డైరెక్టర్ వినోద్ లకు మాత్రం సరైన నటుడు దొరికితే ఓ సూపర్ హిట్ సినిమా తీయగలిగే టాలెంట్ ఉందని మాత్రం నిరూపించుకోగలిగారు. హీరో ఫాదర్ పాత్రలానే హీరో పాత్ర కూడా ఉండి ఉంటే సినిమా రేంజ్ మారిపోయేది.

చూడాలా? వద్దా?: ఫ్రీ టైం, ఒక గంట బోరింగ్ ని భరించగలం అనుకుంటే చూసేయచ్చు.

తెలుగుబులెటిన్.కామ్ రేటింగ్ : 2.5/5