బిగ్గెస్ట్ మల్టీ స్టారర్ ప్లాన్ చేసిన అల్లు అరవింద్.. హీరోలెవరో తెలుసా.?

ప్రస్తుతం టాలీవుడ్ లో పాన్ ఇండియా సినిమాల హవా నడుస్తోంది.. స్టార్ హీరోస్ నుంచి మీడియం హీరోస్ వరకూ సుమారు అరడజనుకు పైగా సినిమాలు లైన్ లో ఉన్నాయి. ఈ లిస్టులోకి మరో బిగ్గెస్ట్ మల్టీ స్టారర్ సినిమాని చేర్చడానికి టాలీవుడ్ అగ్ర నిర్మాత అల్లు అరవింద్ ప్రయత్నాలు మొదలు పెట్టారు. మీరు విన్నది నిజమే కానీ ఇక్కడ ట్విస్ట్ ఏంటి అంటే.. అల్లు అరవింద్ కాబట్టి మెగా హీరోలతో మల్టీ స్టారర్ సెట్ చేశారు అనుకుంటారు. కానీ అయన వారితో కాకుండా అంతకు మించి అనే కాంబినేషన్ ని సెట్ చేసే పనిలో ఉన్నారు.

ఇక అల్లు అరవింద్ సెట్ చేయనున్న కాంబినేషన్ విషయానికి వస్తే.. సూపర్ స్టార్ మహేష్ బాబు – యంగ్ టైగర్ ఎన్.టి.ఆర్ కాంబినేషన్ లో ఓ క్రేజీ ఫిల్మ్ ని ప్లాన్ చేస్తున్నారు. మీరు విన్నది నిజమే.. ఇప్పటికే ఈ విషయం పై ఇద్దరు హీరోలు అల్లు అరవింద్ కి సముఖత తెలిపారని సమాచారం. దాంతో అల్లు అరవింద్ ఈ ఇద్దరి హీరోలని సమంగా బాలన్స్ చేస్తూ, ఆ ఇద్దరు సూపర్ స్టార్స్ కి సరిపోయే కథ తయారు చేయమంటూ టాలీవుడ్ అగ్ర కథా రచయితలను అప్రోచ్ అవుతున్నారట. అల్లు అరవింద్ కి హీరోలు ఒప్పుకోవడమే కంటే వారికి పర్ఫెక్ట్ కథని సెట్ చేయడమే బిగ్గెస్ట్ ఛాలెంజ్ అని చెప్పుకోవాలి.

ఒకసారి కథ ఫిక్స్ అయ్యాకే దానికి తగ్గట్టుగా దర్శకుణ్ణి ఎంచుకునే ఆలోచనలో ఉన్నట్లు సమాచారం.. ఈ న్యూస్ అటు మహేష్, ఇటు తారక్ ఫ్యాన్స్ ని ఎగ్జైట్ చేస్తుంది. ఇప్పటికే రామ్ చరణ్ – ఎన్.టి.ఆర్ కలిసి ‘ఆర్ఆర్ఆర్’ లాంటి క్రేజీ ప్రాజెక్ట్ చేస్తున్నారు. కచ్చితంగా దీనికి మించి ఉండే సినిమానే అభిమానులు ఆశిస్తారు. మరి ఆ రేంజ్ సినిమా కథని ఎవరు తయారు చేసి ఇటు అల్లు అరవింద్ ని, అటు మహేష్ – తారక్ లను సంతృప్తి పరుస్తారో చూడాలి..