కమెడియన్‌ అలీ.. ‘కల’ నిజమవుతోందట!

మంత్రి పదవి సినీ నటుడు అలీ ‘డ్రీమ్‌’. అసెంబ్లీలో ‘అధ్యక్షా’ అంటూ ఎమ్మెల్యే హోదాలో నినదించాలని ఆశించిన అలీకి, తెలుగుదేశం పార్టీ ఒకటికి రెండుసార్లు దెబ్బ కొట్టింది. అయితే, టీడీపీ నుంచి అలాంటి షాక్‌లు అలీకి తగలడం వెనుక, ఆయనగారి ‘అత్యుత్సాహం’ కూడా అసలు కారణమేంటారు కొందరు. టీడీపీ నుంచి టిక్కెట్‌ ఆశించి, వేరే పార్టీలవైపు అలీ తన చూపు మరల్చడంతో సహజంగానే ఎవర్నీ నమ్మని చంద్రబాబు, అలీని అవసరానికి తగ్గట్టు వాడుకుని వదిలేశారన్నది రాజకీయ వర్గాల్లో ఇప్పటికీ విన్పిస్తోన్న అభిప్రాయం.

ఇక, ఇప్పుడు అలీ వైఎస్సార్‌ కాంగ్రెస్‌ పార్టీ నేత. ఎన్నికలకు ముందు వైసీపీలో చేరిన అలీ, ఎన్నికల్లో పోటీ చేయలేదుగానీ, వైసీపీ తరఫున ఎన్నికల ప్రచారంలో పాల్గొన్న విషయం విదితమే. మంత్రి పదవి హామీతోనే అలీ, వైసీపీలో చేరారని అప్పట్లో అంతా అనుకున్నారు. ‘అవునా.? అయితే, అది వస్తుంది..’ అంటూ మంత్రి పదవి విషయమై నర్మగర్భంగా వ్యాఖ్యానించారు అప్పట్లో అలీ.

అయితే, పరిస్థితులు మారాయి.. అలీని వైసీపీ అధినేత వైఎస్‌ జగన్‌ పక్కన పెట్టారట. ముఖ్యమంత్రి అవగానే వైఎస్‌ జగన్‌, అలీనే కాదు.. చాలామందిని మర్చిపోయారంటూ రాజకీయ వర్గాల్లో ప్రచారం జరుగుతోంది. అలీ, తన సన్నిహితుల ద్వారా తనకు జరిగిన అన్యాయంపై మీడియాకి లీకులు పంపించారంటూ విన్పిస్తోన్న ప్రచారం సంగతి పక్కన పెడితే, తాజాగా మరో ఆసక్తికరమైన గాసిప్‌ రాజకీయ వర్గాల్లో హల్‌చల్‌ చేస్తోంది అలీ గురించి.

అలీని ఎమ్మెల్సీగా చేయాలని వైఎస్‌ జగన్‌ భావిస్తున్నారట. ఆ తర్వాత ఆయనకు మంత్రి పదవి ఇస్తారట. అయితే, ఇదంతా జరగడానికి మరో ఆరు నెలల నుంచి ఏడాది సమయం పడుతుందని సమాచారమ్‌. నిజమేనా.? అలీని బుజ్జగించే ప్రయత్నంలోనే వైసీపీ ఈ తరహా లీకులకు పాల్పడుతోందా.? అన్న అనుమానాలూ లేకపోలేదనుకోండి. అది వేరే విషయం.

అన్నట్టు, తన మిత్రుడు పవన్‌ కళ్యాణ్‌తో భేటీ అయ్యేందుకు అలీ ప్రయత్నిస్తున్నారన్నది మరో ఆసక్తికరమైన అంశమిక్కడ. అమెరికాలోనే పవన్‌ని కలిసేందుకు అలీ ఏర్పాట్లు చేసుకున్నారట. కానీ, అలీని ‘నమ్మకద్రోహి’గా ఇప్పటికే ప్రకటించేసిన పవన్‌, అలీని కలిసేందుకు అస్సలేమాత్రం సుముఖత వ్యక్తం చేయలేదట. అయినాగానీ, అలీ తన ప్రయత్నాలు కొనసాగిస్తున్నారని అంటున్నారు.

రేపో మాపో అలీ, పవన్‌ని కలుస్తారనీ.. జనసేన వైపు వెళతారనీ జరుగుతున్న ప్రచారం దరిమిలా వైఎస్‌ జగన్‌ అప్రమత్తమయ్యారట. అదీ అసలు కథ. పోన్లే, పవన్‌ వైపు అలీ వెళ్తారేమో అన్న భయంతో వైఎస్‌ జగన్‌, అలీకి మంత్రి పదవి ఇస్తే.. అలా పవన్‌ వల్ల అలీ మేలు పొందినట్లవుతుందని సినీ వర్గాల్లో గుసగుసలు విన్పిస్తున్నాయి.