ఎయిర్ ఇండియా మళ్ళీ టాటా చెంతకి.. భారత్ తిరోగమనమా.?

ఎయిర్ ఇండియా ప్రైవేటీకరణ.. ఇది ఎప్పటినుంచో వినిపిస్తోన్న, దేశవ్యాప్తంగా చర్చోపచర్చలు జరుగుతున్న.. కీలకమైన అంశం. ఎట్టకేలకు ఎయిర్ ఇండియాకి సంబంధించి కేంద్ర ప్రభుత్వం చేతులెత్తేసింది. టాటా సంస్థకి ఎయిర్ ఇండియాని పూర్తిగా విక్రయించేయడం జరిగిపోతోంది.

టాటా సంస్థ ఈ విషయంలో చాలా చాలా హ్యాపీ. ఎందుకంటే, అసలంటూ ఎయిర్ ఇండియా టాటా సంస్థదే. టాటా నుంచి ఎయిర్ ఇండియాని కేంద్రం చాలా ఏళ్ళ క్రితం కొనుగోలు చేసింది.. అప్పట్లో జస్ట్ రెండు కోట్ల 80 లక్షలు టాటా సంస్థకి చెల్లించి ఎయిర్ ఇండియాని అప్పటి కేంద్ర ప్రభుత్వం సొంతం చేసుకుంది.

ఇప్పుడు దాదాపు 18 వేల కోట్లు చెల్లించి టాటా సంస్థ ఎయిర్ ఇండియాని దక్కించుకుంటోంది. అప్పటికీ ఇప్పటికీ విమానాల సంఖ్యతోపాటు, కరెన్సీ విలువలోనూ చాలా మార్పు వచ్చిందనుకోండి.. అది వేరే సంగతి. కానీ, ఎయిర్ ఇండియా విక్రయాన్ని ఎలా చూడాలి.? భారతదేశం అభివృద్ధిలో పురోగమన దిశను పాటిస్తోందా.? తిరోగమనం వైపు నడుస్తోందా.?

నో డౌట్.. ఇది తిరోగమనమే. అభివృద్ధి వైపుగా అడుగులు పడితే, ఆస్తులు పెరుగుతాయ్. ఆస్తులు అమ్మేసుకుని సొమ్ము చేసుకోవడమంటే, తిరోగమనంలో వున్నట్టే లెక్క. సాధారణ వ్యక్తి దగ్గర్నుంచి, ప్రభుత్వం దాకా ఒకటే సూత్రం. ఓ వ్యక్తి దగ్గర వందలాది, వేలాది ఎకరాలు, వ్యాపార సంస్థలు వుంటే.. జీవితం సజావుగా నడుస్తున్నట్టే. అవే ఆస్తుల్ని అమ్మేసుకుంటూ వెళుతోంటే, అతను తిరోగమనంలో వున్నట్టు భావించాలి.

అబ్బే, తాము దేశాన్ని ఉద్ధరించేయడానికే అన్నిటినీ అమ్మేస్తున్నామని కేంద్రంలోని మోడీ సర్కార్ చెబుతోంది. ‘కుదిరితే అమ్మేస్తాం, కుదరకపోతే మూసేస్తాం..’ అంటూ కొత్త అభివృద్ధి సూత్రాన్ని వల్లిస్తోంది మోడీ సర్కార్. ఒక్క మాటలో చెప్పాలంటే, ‘ఫర్ సేల్’ లేదంటే, ‘క్లోజర్’ అన్నమాట. ఇదంతా చూశాక దేశాన్ని మోడీ సర్కార్ తిరోగమనంలో నడిపిస్తోందని ఎవరైనా విమర్శిస్తే అది తప్పెలా అవుతుంది.?