అభిజ్ఞ చెప్పినట్టే జరుగుతోంది!

ప్రపంచంలో పెను విపత్తు జరగబోతోందంటూ కరోనా మహమ్మారి వెలుగుచూడటానికి ఏడు నెలల ముందు అభిజ్ఞా ఆనంద్ అనే 14 ఏళ్ల బాల మేధావి చెప్పినట్టే ప్రస్తుతం జరగడం తీవ్రంగా చర్చనీయాంశమైంది. గతేడాది ఆగస్టు 22న యూట్యూబ్ లో అతడు పోస్ట్ చేసిన వీడియో ఇప్పుడు విపరీతంగా వైరల్ అయింది. 2019 నవంబర్ నుంచి 2020 ఏప్రిల్ వరకు ప్రపంచంలో భారీ విపత్తు చోటుచేసుకోబోతోందని అతడు అందులో పేర్కొన్నాడు.

విమానరంగం తీవ్రంగా కుదేలవుతోందని, చైనా ప్రధానంగా దెబ్బ తింటుందని వివరించాడు. ప్రస్తుతం ప్రపంచం పరిస్థితి అలాగే ఉంది. ఈ నేపథ్యంలో గతనెల 26న మరో వీడియోలో మార్చి 20 నుంచి ఏప్రిల్ 2 వరకు మరింత ఘోరమైన పరిస్థితి ఉంటుందని, ఏపీపై దీని ప్రభావం భారీగా ఉంటుందని చెప్పాడు. ఇప్పుడు అదే నిజమైంది. ఈ మూడు రోజుల్లో కరోనా కేసులు విపరీతంగా పెరిగిపోయాయి. ఢిల్లీలోని జమాతే ప్రార్థనలకు వెళ్లినవారిలో చాలామందికి కరోనా పాజిటివ్ రావడం.. వారు ఇప్పటికే దేశవ్యాప్తంగా వివిధ రాష్ట్రాలకు వెళ్లిపోవడం.. చాలామందితో కాంటాక్ట్ కావడం వంటి పరిణామాలు తీవ్రమైన ఆందోళన కలిగిస్తున్నాయి.

పైగా ఏపీపై తీవ్ర ప్రభావం ఉంటుందంటూ అభిజ్ఞ చెప్పిన విషయం కూడా నిజమే అయింది. మొన్నటి వరకు కేవలం 23 కేసులు మాత్రమే ఉండగా.. కేవలం 36 గంటల్లో అది ఏకంగా 87కి చేరింది. వీటిలోనూ ఒక్కరోజులో 17 కేసులు నమోదు కాగా, 12 గంటల్లో 47 కేసులు వెలుగు చూడటం పరిస్థితికి అద్దం పడుతోంది. దీంతో అభిజ్ఞ వీడియో వైరల్ గా మారిపోయి దేశవ్యాప్తంగా చర్చ జరుగుతోంది. ఇంత చిన్న వయసులో అంత కచ్చితంగా అతడు ఎలా అంచనా వేశాడు? జ్యోతిష్యానికి ఇంత శక్తి ఉందా అనే చర్చలు సాగుతున్నాయి. ఈ వైరస్ మే 29 తర్వాత తగ్గుముఖం పట్టే అవకాశం ఉందని అతడు పేర్కొన్నాడు.