నటీనటులు: కార్తికేయ, నేహా సోలంకి..
నిర్మాత: అశోక్ రెడ్డి
దర్శకత్వం: శేఖర్ రెడ్డి
సినిమాటోగ్రఫీ: జె. యువరాజ్
మ్యూజిక్: అనూప్ రూబెన్స్
ఎడిటర్: ఎస్.ఆర్ శేఖర్
ఆర్ట్: జీ.ఎం శేఖర్
విడుదల తేదీ: డిసెంబర్ 6, 2019
యంగ్ హీరో కార్తికేయకి `RX100` వంటి సెన్సేషనల్ హిట్ ఇచ్చిన కార్తికేయ క్రియేటివ్ వర్క్స్ పతాకంపై కొత్త దర్శకుడు శేఖర్ రెడ్డి యర్రతో నిర్మాత అశోక్ రెడ్డి గుమ్మకొండ నిర్మించిన సినిమా `90 ML`. వరుస పరాజయాలతో సతమతమవుతున్న కార్తికేయకి ఈ సినిమా మరో బ్లాక్ బస్టర్ హిట్ అవుతుందని ఈ చిత్ర టీం చాలా కాన్ఫిడెంట్ గా ఉన్నారు. మరి ఆ కాన్ఫిడెన్స్ ని నిజం చేసే రేంజ్ లో సినిమా ఉందా లేదా అనేది ఇప్పుడు చూద్దాం..
కథ:
దేవదాస్ లాంటి కొడుకు పుట్టాలనుకున్న ప్రగతికి మన హీరో దేవదాస్ (కార్తికేయ) పుడతాడు. కానీ తను ‘ఫెటల్ ఆల్కహాల్ సిండ్రోమ్ డిజార్డర్’తో పుడతాడు. అనగా తను బతకాలంటే రోజు ఆల్కహాల్ తీసుకోవాలి. అలా రోజూ వయసుకు తగ్గ డొసేజ్ ఆల్కహాల్ తీసుకుంటూ పెరుగుతాడు. తన డ్రింకింగ్ అలవాటు వల్ల వేరే జాబ్ రాకపోవడం వల్ల వైన్ షాప్ మేనేజర్ గా జాయిన్ అవుతాడు. అదే టైంలో సువాసన(నేహా సోలంకి)తో ప్రేమలో పడతాడు. కానీ సువాసనది నాన్ ఆల్కహాల్ ఫ్యామిలీ. అందుకే దేవదాస్ కొన్ని రోజులు తను డ్రింకర్ కాదని మేనేజ్ చేస్తాడు. కానీ ఓ రోజు రెడ్ హ్యాండెడ్ గా దేవదాస్ డ్రింకర్ గా సువాసన అండ్ ఫ్యామిలీకి దొరికిపోతాడు. ఇక అక్కడి నుంచి తన ప్రేమని గెలిపించుకోవడానికి దేవదాస్ డ్రింకింగ్ మానేసాడా? లేక సువాసన అర్థం చేసుకుందా? అలాగే దేవదాస్ – సువాసన లైఫ్ లోకి జాన్ విక్(రవి కిషన్) ఎలా ఎంటర్ అయ్యాడు? వారిద్దరి ప్రేమకి ఎలాంటి ఇబ్బందులు పెట్టాడు? చివరికి దేవదాస్ ప్రేమ గెలిచిందా లేదా? అన్నదే కథ.
సీటీమార్ పాయింట్స్:
ఆన్ స్క్రీన్:
మొదటగా హీరో కార్తికేయ గురించి మాట్లాడుకుందాం.. కార్తికేయ పెర్ఫార్మన్స్ చాలా బాగుంది. ఈ సినిమాతో కామెడీ టైమింగ్ లో బెటర్ మెంట్ కనిపించింది. అలాగే డాన్సులు ఇరగదీశాడు. ఎమోషనల్ సీన్స్, యాక్షన్ ఎపిసోడ్స్ ఎప్పటిలానే బాగా చేసాడు. గత సినిమాలతో పోల్చుకుంటే ఈ సినిమా కార్తికేయకి కాస్త మైలేజ్ తెచ్చి పెట్టె సినిమా అని చెప్పవచ్చు. ఇక హీరోయిన్ నేహా సోలంకి తన పాత్రలో బాగానే చేసింది. రోల్ రిడా, సుదర్శన్, ప్రవీణ్, రఘు లాంటి కమెడియన్స్ అక్కడక్కడా నవ్వించారు. మెయిన్ గా విలన్ పాత్ర చేసిన రవి కిషన్ బాగా చేసాడు. ముఖ్యంగా తన పాత్రని ఒక కామిక్ విలన్ లా డిజైన్ చేశారు. ఆ కామిక్ సెన్స్ తన కాస్ట్యూమ్స్ విషయంలో వర్క్ అయ్యింది. రావు రమేష్, ప్రగతి, సత్య ప్రకాష్, ప్రభాకర్ లు తమ పాత్రలకి న్యాయం చేశారు.
ఇక సినిమా పరంగా చూసుకుంటే.. సినిమా ప్రారంభం చాలా బాగుంటుంది. వెంటనే ఆడియన్స్ ని సినిమాలో ఇన్వాల్వ్ అయ్యేలా చేస్తుంది. అలా మొదటి 30 నిమిషాలు ఆడియన్స్ బాగా ఎంజాయ్ చేస్తారు. ఆ తర్వాత అక్కడక్కడా స్లో అనిపించినా మళ్ళీ ప్రీ ఇంటర్వల్ బ్లాక్ మరియు బ్రేక్ అప్ ఇంటర్వెల్ ఎపిసోడ్ బాగుంది. లాగే సెకండాఫ్ మొదటి 10 నిముషాలు కూడా బాగుంటుంది. ఫస్ట్ హాఫ్ లో ప్రభాకర్ – రఘు కామెడీ బాగా నవ్విస్తుంది. అలాగే కార్తికేయ మందు కోసం ట్రై చేసే పలు సీన్స్ బాగా నవ్విస్తాయి.
ఆఫ్ స్క్రీన్:
కథా పరంగా చూసుకుంటే కార్తికేయ దేవదాస్ పాత్ర కోసం ‘ఫెటల్ ఆల్కహాల్ సిండ్రోమ్ డిజార్డర్’ పాయింట్ చాలా బాగుంది. దానివల్లే ఆడియన్స్ చాలా ఫాస్ట్ గా కెనెక్ట్ అవుతారు. ఇక ప్రొడక్షన్ డిజైనింగ్ చాలా గ్రాండ్ గా ఉంది. చెప్పాలంటే కథకి అవసరమైన దానికన్నా ఎక్కువ ఇచ్చారని చెప్పుకోవచ్చు. అనూప్ రూబెన్స్ బ్యాక్ గ్రౌండ్ మ్యూజిక్ బాగుంది. ముఖ్యంగా ‘వినిపించుకోరు’ సాంగ్ చాలా బాగా వర్కౌట్ అయ్యింది.
మైనస్ పాయింట్స్:
ఆన్ స్క్రీన్:
ఫస్ట్ హాఫ్ లో మొదట 30 నిమిషాల తర్వాత మనం చాలా కమర్షియల్ సినిమాల్లోలానే హీరోయిన్ దగ్గర హీరో తన క్యారెక్టర్ ని మేనేజ్ చేసే సీన్స్ వస్తుంటాయి. అవి అంతగా ఆకట్టుకోలేదు, ఆ లవ్ ట్రాక్ లో కామెడీ అంతగా వర్కౌట్ అవ్వలేదు. ఇక సెకండాఫ్ అయితే చాలా అంటే చాలా బోరింగ్ గా ఉంది. స్టోరీ లైన్ చాలా సింపుల్ అవ్వడం, అది ఇంటర్వెల్ దగ్గరే చెప్పేయడంతో ప్లే తో సెకండాఫ్ నడిపిద్దాం అనుకున్నారు, కానీ డైరెక్టర్ వేసుకున్న ప్లే అసలు వర్కౌట్ అవ్వలేదు. ఎందుకంటే ఫ్రెష్ ట్రీట్ మెంట్ రాసుకోకుండా కమర్షియల్ యాంగిల్ లో ఎన్నో సినిమాల్లో చెప్పేసిన సీన్స్ అండ్ ఫైట్స్ ని వేసుకుంటూ వెళ్లారు. ముఖ్యంగా ఇంటర్వల్ బ్రేకప్ తర్వాత మళ్ళీ సెకండాఫ్ లో నాలుగైదు బ్రేకప్ మూమెంట్స్ చూస్తాం.. ప్రతి సారి ఓ సీన్, బ్రేకప్ అండ్ సాంగ్ ఇదే ఫార్మాట్ లో వెళ్తుంది తప్ప కథ పరంగా వాళ్ళ ఎమోషన్ ని చూపించేలా సీన్స్ సరిగా రాసుకోలేదు. 15 నిమిషాల తర్వాత చెప్పిన సీన్స్ నే మళ్ళీ రిపీటెడ్ గా లొకేషన్స్ మార్చి ఎందుకు చెబుతున్నాడ్రా బాబు అనే ఫీలింగ్ లోకి ఆడియన్స్ వెళ్ళిపోతారు. సరే అప్పటి దాకా భరించాం ఇక అన్నా ఫినిష్ చేస్తాడు అనుకునే టైంలో ఒక ఐటమ్ సాంగ్, ఇంకో యాక్షన్ బ్లాక్ పెట్టి మరీ రొటీన్ కమర్షియల్ మూసలో ఇంకా చిరాకు పెట్టించేసాడు. అలా సెకండాఫ్ ఈ సినిమాకి బిగ్గెస్ట్ మైనస్. అలాగే లవ్ లో ఉన్న పెయిన్ ని బలంగా ఇద్దరిలోనూ ఎక్కడా చూపించలేదు. వాళ్ళ ప్రకారం చూపించారు అనుకుంటున్న సీన్స్ అసలు వర్కౌట్ అవ్వలేదు..
ఆఫ్ స్క్రీన్:
కథే హీరో.. ఆ హీరో ని రెడీ చేయడం కోసం ఎంచుకున్న డిజార్డర్ పాయింట్ చాలా బాగుంది. ఈ విషయంలో మెచ్చుకోవాలి. కానీ దాన్ని పూర్తి కథగా ఫినిష్ చేసే టైంకి పాయింట్ అంత బాగా చేయలేదు. దానిని తెరపై ఇంకా బోరింగ్ గా చూపించారు. పాయింట్ ఎంత ఫ్రెష్ గా ఉందొ అంతే ఫ్రెష్ గా ట్రీట్మెంట్ రాసుకొని ఉంటే ఆటోమాటిక్ గా కథలో కమర్షియల్ ఎలిమెంట్స్ కుదిరేసేవి. అలా కాకుండా ఒక ఫార్ములాయిక్ పాట, ఫైట్, కామెడీ బిట్ అన్న ఫార్మటులో కథ రాయడం వలన సెకండాఫ్ చాలా బాడ్ గా తయారయ్యింది. ఇకపోతే స్క్రీన్ ప్లే కూడా అదే బేసిక్ ఫార్మాట్.. మొదటి 15 నిమిషాల తర్వాత నెక్స్ట్ వచ్చే సీన్స్ మరియు డైలాగ్స్ కూడా ఆడియన్ చెప్పేసేంత వీక్ గా, ఊహాజనితంగా రాసుకున్నారు. ఇక డైలాగ్స్ కూడా చెప్పుకోదగ్గ గొప్పగా ఏం లేవు. ఇక డైరెక్టర్ గా శేఖర్ రెడ్డి గురించి చెప్పాలంటే అనుకున్న పాయింట్ ని మొదటి 5 నిమిషాల్లోనే ఆడియన్స్ కి కనెక్ట్ చేయడంలో సక్సెస్ అయ్యాడు. కానీ ఆ కెనెక్షన్ ని చివరి దాకా హోల్డ్ చేయలేకపోయాడు. ముఖ్యంగా సెకండాఫ్ విషయంలో అయితే పూర్తిగా విఫలమయ్యాడు. ఫస్ట్ హాఫ్ యావరేజ్ ఉన్నా సెకండాఫ్ సూపర్బ్ గా ఉండాలి మరియు పాయింట్ ఫ్రెష్ ఉంటే చాలదు స్టోరీ ట్రీట్ మెంట్ కూడా ఫ్రెష్ గా ఉండాలి అనే బేసిక్ లాజిక్స్ ని మిస్ అవ్వడం వల్ల ఒక 50% మాత్రమే సక్సెస్ అయ్యాడు. అలాగే రన్ టైం విషయంలో కూడా డైరెక్టర్ ది రాంగ్ జడ్జ్ మెంట్. సుమారు 20-30 నిమిషాల సినిమాని కట్ చేస్తే సినిమా స్పీడ్ గా ఉండి, ప్రేక్షకులకి ఇంకా బెటర్ ఫీలింగ్ వచ్చేది.
ఇక యువరాజ్ సినిమాటోగ్రఫీ ఎలా ఉంది అంటే 70% బాగుంటే, 30% బాలేదు. చాలా చోట్ల కెమరా షేక్స్, ఇమేజ్ బ్లర్ ఉంటుంది. అవి చూసే ఆడియన్స్ కి చాలా ఇబ్బంది కలిగించాయి. అలాగే ఎడిటర్ ఎస్ఆర్ శేఖర్ వర్క్ ఫస్ట్ హాఫ్ పరంగా ఓకే కానీ సెకండాఫ్ పరంగా మాత్రం చాలా వీక్. ఈయన అయినా డైరెక్టర్ తో పోరాడి మరీ రిపీటెడ్ సీన్స్ వస్తున్నాయి కట్ చేద్దాం అని ఒక 20 నిమిషాలన్నా ట్రిమ్ చేసి ఉండాల్సింది.
విశ్లేషణ:
2019లో ఇప్పటికే మూడు పరాజయాలు(హిప్పీ, గుణ 369, గ్యాంగ్ లీడర్) చవి చూసిన యంగ్ హీరో కార్తికేయకి ఈ ’90ML’ సినిమా కూడా తనకి కావాల్సిన స్ట్రాంగ్ హిట్ ని ఇవ్వలేకపోయిందనే చెప్పాలి. కానీ ఈ ఏడాది నిరాశపరిచిన సినిమాలకంటే ఇది బెటర్. స్టోరీ లైన్ బాగున్నా, పూర్తి కథగా తెరపై మెప్పించలేకపోయారు. యూనివర్సల్ కనెక్షన్ పాయింట్ అయిన ఆల్కహాల్ అలియాస్ లిక్కర్ బ్యాక్ డ్రాప్ లో చేసిన సినిమా కావడం వలన మరియు యూత్ అట్రాక్షన్ వలన ఓపెనింగ్స్ గత సినిమాలకంటే బెటర్ గా ఉండే అవకాశం ఉంది. ఫస్ట్ హాఫ్ బాగుంటే చాలు సెకండాఫ్ ఎంత బోరింగ్ అండ్ రొటీన్ గా ఉన్నా కమర్షియల్ బొమ్మ కాబట్టి చూసేస్తాం అనుకునే వారు చూడచ్చు, మిగతా వారికి సెకండాఫ్ హెడేక్ గా అనిపిస్తుంది. పాయింట్ బాగుండి, తెరపై పూర్తిగా మెప్పించలేకపోయిన హాఫ్ బేక్డ్ సినిమాల్లో ’90ML’ ని చెప్పుకోవచ్చు. ఒక్క మాటలో ’90ML’ ఎలా ఉంది అంటే, ‘సూపర్బ్ స్టార్టింగ్ – వరస్ట్ ఎండింగ్’ అని చెప్పచ్చు.
ఫైనల్ పంచ్: 90ML – ఈ బ్రాండ్ లో పెద్ద కిక్ లేదు.