ఆ 90శాతం మంది వల్లే కరోనా వ్యాప్తి.. సర్వేలో షాకింగ్ విషయాలు..!

కరోనాకు వ్యాక్సిన్ వచ్చేస్తోంది.. ఇక హాయిగా గతంలో ఉన్నట్టే ఉండొచ్చు అనుకోవడం భ్రమే. వ్యాక్సిన్ వచ్చినా ప్రస్తుతం తీసుకుంటున్న జాగ్రత్తలన్నీ తీసుకోవాల్సిందే. వ్యాక్సిన్ ఒక వ్యక్తిని కరోనా బారిన పడకుండా కాపాడుతుంది కానీ.. వైరస్ ను నిర్మూలించలేదు. ఈ అంశాన్ని కుండబద్దలు కొట్టినట్టు చెప్తున్నారు అమెరికాలోని బేలార్ కాలేజీ ఆఫ్ మెడిసన్ లోని నేషనల్ స్కూల్ ఆఫ్ ట్రాపికల్ మెడిసిన్ అసోసియేట్ విభాగం శాస్త్రవేత్తలు. ఇందులో భాగంగా ప్రతిఒక్కరూ మాస్క్ వాడకంతోపాటు దానిని జాగ్రత్తలతో వినియోగించాలని కూడా అంటున్నారు. వారు చేసిన వ్యాఖ్యలకు భారత్ లో ప్రస్తుతం మాస్క్ ల వినియోగానికి పొంతన లేకపోవడం విశేషం. ఈమేరకు ఓ సర్వేలో వెల్లడించిన విషయాలు ఆందోళన రేకెత్తిస్తున్నాయి.

దేశంలో మాస్క్ లను సరైన పద్దతిలో ఉపయోగిస్తున్నవారు కేవలం 10శాతంలోపేనని తేలింది. వైద్య ఆరోగ్యశాఖ ఓ స్వచ్ఛంద సంస్థతో కలిసి 20వేల మందిలో చేసిన సర్వేలో విస్తుగొలిపే విషయాలు వెలుగు చూశాయి. 90శాతం మంది మాస్క్ పెట్టుకున్నా మక్కు కిందకో, గెడ్డం కిందకో పెట్టుకుంటున్నారు. 65శాతం మంది మాస్క్ ముందు భాగాన్ని తరచూ తాకుతున్నారు. ఇది ఏమాత్రం మనల్ని, ఇతరులను కరోనా నుంచి రక్షణ కల్పించదు. మాస్క్ ముందు భాగాన్ని తాకి అదే చేత్తో ముక్కునో, నోటినో తాకితే వైరస్ శరిరంలోకి చేరినట్టే. వైరస్ ఉన్నవారు మాస్క్ పెట్టుకోని వారు మాట్లాడిన సందర్భంలో వారి వాటర్ డ్రాప్స్ మన మాస్క్ కు చేరినా వైరస్ చేరుతుంది. ఆ సమయంలో చేతిని మాస్క్ ముందుభాగంపై వేస్తే ఇంతే సంగతులు. ట్రిపుల్ లేయర్ మాస్క్ శ్రేయస్కరం. నోరు, ముక్కు పూర్తిగా కవర్ అయ్యేలా మాస్క్ ధరించాలి.

ఓసారి మాస్క్ పెట్టాక మళ్లీ దాని మీద చేయి వేయొద్దు. చెవి దగ్గర లేయర్లు పట్టుకుని తీసి వేడినీటిలో వేసి ఉతకాలి. దాదాపు 4 గంటలు ఆరబెట్టిన తర్వాతే మళ్లీ ఉపయోగించాలి. 90 శాతం మంది ఈ జాగ్రత్తలు, నియమాలు పాటించడంలేదని కూడా పరిశీలనలో తేలింది. రద్దీ ప్రాంతాల్లో తిరగడం కూడా వైరస్ వ్యాప్తికి ఓ కారణం. భారత్ లో ఈ జాగ్రత్తలు ఏవీ పాటించడం లేదని వైద్య ఆరోగ్య శాఖ అంటోంది. మరి ప్రజలు ఇప్పటికైనా మాస్క్ వాడకంలో అన్ని జాగ్రత్తలు పాటించాలి.