పచ్చని రాష్ట్రంలో చిచ్చు: ‘కడుపు మంట’ చల్లారిందా.?

దేశంలో ఎక్కడా ఏ జిల్లాకీ అంబేద్కర్ పేరు పెట్టాలనే డిమాండ్ రాలేదు. కేవలం, ఆంధ్రప్రదేశ్‌లో కోనసీమ ప్రాంతానికి మాత్రమే డాక్టర్ బీఆర్ అంబేద్కర్ పేరు పెట్టాలనే డిమాండ్ వచ్చిందట.! ఎంత వింత ఇది.? రాష్ట్రంలో కొన్నాళ్ళ క్రితం కొత్త జిల్లాల ఏర్పాటు జరిగింది. ఎన్టీయార్ జిల్లా, అల్లూరి జిల్లా.. ఇలా వ్యక్తుల పేర్లతో కొత్త జిల్లాలు ఏర్పాటయ్యాయి.

అంతకు ముందు వైఎస్సార్ జిల్లా, పొట్టి శ్రీరాములు జిల్లా.. ఇలా వ్యక్తుల పేర్లతో జిల్లాలున్నాయ్. అన్నమయ్య జిల్లా, సత్యసాయి జిల్లా కొత్తగా ఏర్పాటయ్యాయి. ఆ సమయంలో అంబేద్కర్ జిల్లా.. అని పేరు పెట్టకుండా, ఆ తర్వాత కోనసీమ జిల్లా పేరుని అంబేద్కర్ జిల్లాగా మార్చడం వెనుక అధికార పార్టీ వ్యూహమేంటి.? ఆ వ్యూహం సత్ఫలితాన్నివ్వడం వల్లే ఈ దుస్థితి వచ్చిందా.? లేదంటే, ఆ వ్యూహం బెడిసి కొట్టి పరిస్థితి ఇలా దిగజారిందా.?

సవాలక్ష ప్రశ్నలు ఇలానే తెరపైకొస్తున్నాయి. ఏది నిజం.? ఏది అవాస్తవం.? నిజానికి, ఎవరికీ ఏమీ అర్థం కావడంలేదు. రాష్ట్రానికి రాజధాని లేదు.. అభివృద్ధి ఊసే లేదు. అధికార పార్టీకి చెందిన ఎమ్మెల్సీ ఓ హత్య కేసులో ఇరుక్కుని అరెస్టయ్యాడు.. తానే ఆ హత్య చేశానని ఒప్పుకున్నాడు. ఇంతలోనే, కోనసీమ జిల్లాలో ‘మంట’ చెలరేగింది. ఓ మంత్రిగారి ఇల్లు తగలబడింది. ఓ ఎమ్మెల్యే ఇల్లు కూడా తగలబెట్టేశారు ఆందోళనకారులు.

చిత్రమేంటంటే, చంద్రబాబు హయాంలో అప్పటి ప్రతిపక్ష నేత మీద జరిగిన కోడి కత్తి దాడిలో నిందితుడు కూడా ఈ కోనసీమ ప్రాంతానికి చెందినవాడే కావడం. ఇదే కోనసీమ ప్రాంతం వున్న ఉమ్మడి తూర్పుగోదావరి జిల్లాలోనే రత్నాచల్ ఎక్ప్‌ప్రెస్ రైలుని, కాపు ఉద్యమం సమయంలో ఆందోళనకారులు తగలబెట్టేశారు.

అక్కడ మంట మండుతోంటే, ఆ మంటల్లో చలికాచుకుంటున్న చందాన, ఈ ఘటన వెనుక విపక్షాల కుట్ర వుందని అధికార పార్టీ ఆరోపించడం కొత్త అనుమానాలకు తెరలేపుతోంది. డాక్టర్ బీఆర్ అంబేద్కర్ పేరు పెట్టాలనుకుంటే, కొత్త జిల్లాల ఏర్పాటు సందర్భంగా ఏ వివాదం లేని చోట ఏదో ఒక జిల్లాకి ఆ పేరు పెట్టి వుండాలి.

అన్ని పార్టీలూ అంబేద్కర్ పేరుని కోనసీమ జిల్లాకి పెట్టాలన్నాయని వైసీపీ చెబుతోంది. మరి, రాజధాని అమరావతికి కూడా అన్ని పార్టీలూ మద్దతిచ్చాయి కదా.! సీపీఎస్ రద్దు చేయాలని అన్ని పార్టీలూ కోరుతున్నాయి కదా.? అంబేద్కర్ పేరుతో రాష్ట్రంలో అత్యంత హేయమైన రాజకీయం జరుగుతోంది. ఈ రాజకీయానికి తెరవెనుకాల స్కెచ్ వేసిందెవరు.? రాష్ట్రాన్ని రావణ కాష్టంగా మార్చి రాజకీయ లబ్ది పొందాలనుకుంటున్నదెవరు.?